संस्थाको परिचय

जनमुखी बहुउद्देश्यीय सहकारी संस्था लिमिटेड वि.सं. २०६५ साल पौष २२ गते नुवाकोट जिल्लाको बिदुर नगरपालिका वडा नं. ४, बिदुरमा मुख्य कार्यालय रहने गरी स्थापना गरिएको संस्था हो। यस संस्थाको स्थापना तत्कालीन सहकारी ऐन २०४८ बमोजिम गरिएको हो। प्रारम्भमा ४२ जना शेयर सदस्यहरूले रु. ८,१०,३००।– शेयर पुँजी संकलन गरी सहकारी अभियानलाई सशक्त रुपमा अघि बढाउने उद्देश्य राखिएको थियो।

यस संस्थाको प्रमुख उद्देश्य समाजका निम्न आयस्तर भएका गरिब, जनजाति, दलित, अल्पसंख्यक, द्वन्द्वपीडित, घाइते तथा अन्य आर्थिक रूपमा पछाडि परेका वर्गको सामाजिक, आर्थिक तथा सांस्कृतिक जीवनस्तर उकास्नु हो। यसका लागि समाजमा छरिएर रहेको पुँजीलाई एकीकृत गर्दै व्यवसाय र उत्पादनमूलक क्षेत्रमा लगानी गरी आर्थिक सशक्तिकरणमा योगदान पुर्याउने लक्ष्य लिएको छ।

संस्थाले निम्न आर्थिक अवस्था भएका व्यक्तिहरूलाई विभिन्न वित्तीय सेवाहरू प्रदान गर्दै आत्मनिर्भर बनाउने उद्देश्य राखेको छ। यसअन्तर्गत:

• – स्वरोजगारमुखी कार्यक्रमहरू सञ्चालन
  – कृषि प्रवर्द्धन कार्यक्रम
  – लघुवित्त तथा ऋण लगानी सेवा
  – उद्यमशीलता अभिवृद्धि गर्ने तालीम तथा सीपमूलक कार्यक्रम
  – महिला तथा पिछडिएका वर्गका लागि विशेष सहयोग तथा कार्यक्रम
  – घरदैलोमै गएर सेवा तथा सल्लाह दिने व्यवस्था

यस संस्थाले समय-समयमा आउने प्राकृतिक विपत्ति, महामारी तथा अन्य आपतकालीन परिस्थितिमा पनि समुदायसँग सहकार्य गर्दै विभिन्न किसिमका राहत कार्यक्रम सञ्चालन गर्दै आएको छ। महामारीका समयमा खाद्यान्न, स्वास्थ्य सामग्री तथा अन्य आवश्यक सामग्रीहरू वितरण गरी समाजको सहयोगमा संलग्न रहँदै आएको छ।

भविष्यमा संस्थाले वित्तीय पहुँचलाई अझ प्रभावकारी बनाउन डिजिटल सेवाहरूलाई प्रवर्द्धन गर्दै आधुनिक प्रविधिहरू समावेश गर्ने योजना बनाएको छ। सहकारी अभियानलाई प्रवर्द्धन गर्दै, सदस्यहरूको आर्थिक सशक्तिकरणमा टेवा पुर्याउने उद्देश्यले नयाँ योजनाहरू कार्यान्वयन गरिँदै जानेछ।

जनमुखी बहुउद्देश्यीय सहकारी संस्था लिमिटेडले पारदर्शी वित्तीय सेवा प्रदान गर्दै समुदायको समग्र उन्नतिमा योगदान पुर्याउने प्रतिबद्धता राखेको छ।